Hönnun og smíði lífherminna griphópa

Rannsóknaverkefnið fjallar um smíði sérhæfðra griphópa fyrir tiltekin prótein og nákvæma prófun á gripeiginleikum þeirra. Beitt er þeirri tækni að hanna, með aðstoð tölvu og sérstaks sameindagrafíkbúnaðar sem gert getur þrívíddarlíkan af próteinsameindinni, griphópa sem líklegir eru til að bindast próteininu með sérhæfðum hætti. Síðan eru viðkomandi griphópar smíðaðir á föstum fasa á agarósaburðarefni, með aðferð sem byggir á efnafræði þríazíns. Smíðaðir eru margir hópar byggðir á sama strúktúrþema með slembiaðferð (e. combinatorial chemistry). Bindieiginleikar efnanna eru síðan prófaðir á smáum skala og valdir úr hópar til frekari skoðunar eða endurhönnunar. Loks eru valdir hópar smíðaðir í upplausn til að unnt sé að skala smíðina upp til hagnýtingar og til að unnt sé að sannreyna byggingu þeirra með kjarnarófsathugunum (NMR)