Fjölskyldur samkynhneigðra foreldra

Í gegnum tíðina hefur lítið verið fjallað um fjölskyldur samkynhneigðra út frá upplifun þeirra heldur hafa rannsóknir frekar skoðað þær í samanburði við gagnkynhneigðar fjölskyldur. Heimur samkynhneigðra fjölskyldna er þó sérstakt fyrirbæri og rannsóknir hafa sýnt að þær upplifa oft töluverðar áskoranir sem snúa að lagalegu umhverfi og félagslegum stuðningi. Markmið ritgerðarinnar er að skoða hver staða þekkingar fræðanna og rannsókna er á reynslu og upplifunum samkynhneigðra fjölskyldna og þá þætti í umhverfi þeirra sem móta hana. Sérstök áhersla verður lögð á þekkingu félagsráðgjafa og annarra í störfum sínum með samkynhneigðum fjölskyldum. Notast var við ritrýndar greinar, skýrslur og upplýsingar frá ráðgjafa sem starfar með samkynhneigðum einstaklingum og fjölskyldum hér á landi. Niðurstöður rannsókna hafa sýnt að ólíffræðilegar og líffræðilegar mæður taka jafnan þátt í umönnun og uppeldi barna sinna (Du Chesne og Bradley, 2007; Goldberg og Perry-Jenkins, 2007) og að samkynhneigðir karlmenn vilja gjarnan eignast börn (Lassiter, Dew, Newton, Hays, og Yarbrough, 2006; Goldberg, Downing og Moyer, 2012). Uppkomin börn samkynhneigðra eru gjarnan umburðarlynd og hafa jafnframt minna fastskorðaðri hugmyndir um kynhneigð og kyngervi en börn gagnkynhneigðra (Goldber, 2007; Gibson, 2010). Áskoranir sem þessar fjölskyldur glíma við eru margar samfélagslega og lagalega skapaðar vegna veikrar réttarstöðu og neikvæðra viðhorfa til samkynhneigðra sem hafa áhrif á tengsl og líðan innan fjölskyldunnar. Ráðgjöf til þessara fjölskyldna snýst um að veita þeim stuðning og valdefla þær til að takast á við slíkar áskoranir ásamt því að veita þeim upplýsingar og leiðsögn varðandi rétt til barneigna. Umfjallanir um samkynhneigðar fjölskyldur í fræðum virðast enn nokkuð einkennast af stífum skilgreiningum á hvað felst í því að vera foreldri, fyrirfram ákveðnum kyngervum og upphafningu líffræðilegra tengsla ásamt samanburði við gagnkynhneigðar fjölskyldur. Fræðimenn eru þó byrjaðir að átta sig á mikilvægi þess að skoða þessar fjölskyldur út frá öðru sjónarhorni og kanna upplifun þeirra og líðan sem leið til þess að auka þekkingu á margbreytileika fjölskyldna