Fjölbreytileiki í hlutverki fósturforeldra. Undirbúningur og stuðningur

Fósturráðstafanir eru sértækar meiriháttar aðgerðir af hálfu barnaverndaryfirvalda og er ekki beitt nema miklir erfiðleikar steðji að barni og/eða fjölskyldu þess. Fósturforeldrar eru þeir sem barnaverndarnefnd leitar til í slíkum málum en það er fólk sem á það sameiginlegt að hafa áhuga á að taka börn í fóstur og hefur hlotið til þess tilskilið leyfi. Hlutverk fósturforeldra er fjölbreytilegt og frábrugðið hlutverki annarra foreldra að því leyti að fósturforeldrar fá börnin á mismunandi aldri, markmið fóstursins eru mismunandi og þeir þurfa að vera í samstarfi við og undir ákveðnu eftirliti ýmissa aðila sem ekki er að skipta í öðrum fjölskyldum, en allt þetta má flokka sem umframkröfur. Það er því margt sem þarf að hafa í huga og starfið þar af leiðandi ekki fyrir hvern sem er. Til að geta sinnt hlutverki sínu á sem bestan hátt þurfa fósturforeldrar á undirbúningi og stuðningi að halda. Ef vel er staðið að hvoru tveggja ætti að vera hægt að draga úr mögulegum vandamálum. Barnaverndarstofa og barnaverndarnefndir sjá að stórum hluta um undirbúning og stuðning en meirihluti starfsmanna barnaverndarnefnda er menntaðir félagsráðgjafar. Félag fósturforeldra er starfrækt á Íslandi og geta allir fósturforeldrar óskað eftir aðild að því