Tími verðmætari en peningar: Ákvarðanatökuferli, áskoranir og ávinningur af styttingu vinnuvikunnar

Þessi BS ritgerð fjallar um ákvarðanatökuferli og áskoranir stjórnenda við styttingu vinnuvikunnar og þann ávinning sem henni fylgir. Rannsóknin miðar að því að skilja hvaða ástæður liggja að baki ákvarðanatökunni, þær áskoranir sem styttingin hefur í för með sér og hvaða ávinning hún uppsker fyrir skipulagsheildina jafnt sem hagsmunaaðila. Markmið rannsóknarinnar er að varpa ljósi á ákvarðanatökuferli stjórnenda, væntingar þeirra og efasemdir, innleiðingarferlið og áskoranir jafnt sem ávinning af styttingu vinnuvikunnar. Rannsóknarspurningin er því, hvert er ákvarðanatökuferli stjórnenda, áskoranir og ávinningur af styttingu vinnuvikunnar? Viðmælendur voru þrír stjórnendur úr tveimur einkafyrirtækjum og einni opinberri stofnun, allir hafa þeir nú þegar innleitt styttingu vinnuvikunnar og glímt við þær áskoranir sem henni fylgdu. Helstu niðurstöður benda til þess að ákvarðanatökuferlið sé það einfaldasta að mati stjórnenda en í öllum tilfellum treystu þeir mikið á eigið innsæi og reynslu enda allir stjórnendur til margra ára. Áskoranirnar lágu einna helst í útfærslu, kynningu og innleiðingu á reglum sem fylgdu styttingunni líkt og að minnka skrepp á vinnutíma eða jafnvel að setja takmörk á líkamsrækt í hádeginu. Ávinningur af styttingu vinnuvikunnar fór fram úr væntingum stjórnenda en þar má nefna aukna starfsánægju og framleiðni, færri fjarvistir og fjárhagslegan hagnað. Styttingin laðaði einnig að gott starfsfólk sem var orkumeira í vinnunni enda um aukin lífsgæði að ræða að vinna styttri vinnuviku