Aðgreining íslenskra raforkusölufyrirtækja: Virðisaukning í gegnum samfélagsábyrgð fyrirtækja

Breytingar á viðskiptaumhverfi íslenskra raforkusölufyrirtækja hafa skapað bæði áskoranir og tækifæri og gert það að verkum að fyrirtækin hafa þurft að endurskoða hlutverk sín til virðissköpunar. Raforkuneytendur skortir vitund og þekkingu um raforkumarkaðinn og við fyrstu sýn virðist verð vera eini þátturinn sem neytendur telja að skipti þá máli við val á milli raforkusölufyrirtækja. Ýmislegt bendir þó til þess að áherslan á verð sé aðeins afleiðing einsleitni og aðgreiningarskorts á milli raforkusölufyrirtækja. Fyrirtækin standa því frammi fyrir þeirri áskorun að skapa sér skýra aðgreiningu frá samkeppnisaðilum sem skapar viðskiptavinum þeirra aukið virði í viðskiptunum og gefur þeim ástæðu til að velja eitt vörutilboð umfram annað. Markmið þessarar greinar er að svara því hvort raforkusölufyrirtæki geti skapað slíkt virði í hugum viðskiptavina með því að aðgreina sig byggt á samfélagsábyrgð fyrirtækja. Helstu niðurstöður eru þær að raforkusölufyrirtæki geta skapað viðskiptavinum aukið virði með aðgreiningu byggðri á samfélagslegri ábyrgð, þó að slíkt sé af og frá sjálfgefið. Fjölmargir þættir geta haft áhrif á það hvort slík stefna sé líkleg til að skapa virði, svo sem orðspor fyrirtækis, skuldbinding þess við stefnuna, hvatinn að baki innleiðingu stefnunnar, hvernig framkvæmd stefnunnar er háttað og hvernig henni er miðlað til neytenda