Stuðningur ríkis og sveitarfélaga við barnafjölskyldur: Samanburður á Íslandi og Svíþjóð

Í þessari ritgerð skoðar höfundur þann stuðning sem foreldrar fá frá ríki og sveitarfélögum. Sá stuðningur getur birst á margvíslegan hátt svo sem með launuðu orlofi, fæðingarstyrk, barnabótum, vaxtabótum og húsaleigubótum. Einnig er afsláttur og niðurgreiðslur veittar vegna barna á leikskóla eða hjá dagforeldri. Markmið ritgerðarinnar var að bera saman þessa þætti með tilliti til hjúskaparstöðu á Íslandi og í Svíþjóð þar sem miðað er við fjölskyldur með börn undir skólaskyldualdri. Niðurstöður leiddu í ljós að stuðningur er meiri til fjölskyldna með börn í Svíþjóð en á Íslandi. Við samanburð milli landanna kom í ljós að fæðingarorlofið er lengra og rýmra í Svíþjóð. Greiðslur barnabóta í Svíþjóð eru þær sömu fyrir alla og greiddar út mánaðarlega en á Íslandi eru þær tekjutengdar og greiddar ársfjórðungslega. Á Íslandi eru greiddar vaxtabætur en í Svíþjóð er vaxtatekjum og vaxtagjöldum jafnað saman áður en til skattlagningar kemur. Greiddar eru húsaleigubætur á Íslandi en í Svíþjóð er ekki gerður greinarmunur á hvort um leigu eða eigið húsnæði sé að ræða og kallast þær greiðslur húsnæðisframlag. Börn komast fyrr inn á leikskóla í Svíþjóð og er opnunartími þar sveigjanlegri og gjöld lægri