Áhrif skilnaðar á samskipti foreldra og barna á fullorðinsárum.

Þróun í samfélaginu felur í sér breytingar á lífsháttum. Breytingar á framleiðsluháttum og vinnumarkaði hafa í för með sér breytingar á lífsstíl og samskiptum einstaklinga. Fjölskyldur sem eru meginstoðir samfélagsins hafa breyst að bæði formi og gerð með fleiri sambúðarform að ryðja sér til rúms. Skilnaðartíðni er að aukast og ungmenni kjósa frekar að vera í sambúð en að ganga í hjónaband. Börn sem upplifa skilnað foreldra sinna eru líklegri til þess að glíma við tilfinningaleg, geðræn og félagsleg vandamál og búa þau gjarnan við verri lífskjör. Þessi ritgerð hefur það markmið að kanna hver langtímaáhrif skilnaðar og sambúðarslita getur haft á samskipti foreldra og barna. Niðurbrot í samskiptum foreldranna eftir skilnað hefur skýrt forspágildi um aðlögunarhæfni og líðan barna í kjölfar þess og talið er að brostið eða ófullnægjandi foreldrasamstarf sé einn þáttur í því að afleiðingar skilnaðarins eldist með börnunum. Það getur einnig leitt til þess að annaðhvort foreldrið hörfi úr lífi barnsins til skemri eða lengri tíma. Þetta hefur þau áhrif að stuðningsnet ungmenna gisnar. Innlendar og erlendar rannsóknir segja að börn sem hafa upplifað skilnað foreldra sinna fá minni stuðning hvort sem um ræðir fjárhagslegan eða tilfinningalegan. Þessi þróun hefur vakið fræðimenn til umhugsunar um hvaða áhrif það gæti haft á komandi kynslóðir að fjölskyldunetið og vægi þess sé að gisna. Hætta er á að ef tengslarof milli foreldra og barna varir fram á fullorðinsár að þá sýna uppkomin börn fráskilinna foreldra svipaða hegðun og foreldrar þeirra. Þau hörfa og skortir hollustu gagnvart foreldrum sínum á efri árum