Menningargreind og starfsmenn farþegaþjónustu

Viðskiptafræðideild hefur samþykkt lokaðan aðgang að þessari ritgerð í tvö ár.Menningargreind segir til um hæfni einstaklinga til að meta og skilja þvermenningarlegar aðstæður sem þeir standa frammi fyrir, nýta þekkingu sína og getu til að bregðast við á viðeigandi hátt. Ritgerðin fjallar um rannsókn sem gerð var á meðal framlínustarfsmanna sem starfa við farþegaþjónustu á Keflavíkurflugvelli. Markmið rannsóknarinnar var að kanna styrk- og veikleika starfsmannahópsins á sviði menningargreindar. Lagður var fyrir spurningalistinn fjögurra þátta skali menningargreindar. Í niðurstöðum eru styrkleikar og veikleikar hópsins skoðaðir með hliðsjón af fjórum þáttum menningargreindar. Annars vegar voru vísbendingar um að starfsmennirnir búi yfir færni í að meta eigin þekkingu og beita henni í þeim þvermenningarlegu aðstæðum sem starfi þeirra fylgir og að þátttakendur búi yfir hvata og drifkrafti þegar kemur að því að eiga samskipti við aðra menningarhópa og eru þeir opnir fyrir því að aðlagast annarri menningu. Hins vegar voru vísbendingar um að sjálfur þekkingarþátturinn væri helsti veikleikinn innan hópsins. Jafnframt bentu niðurstöður til þess að hópurinn leggi litla áherslu á að aðlaga talmál sitt í þvermenningarlegum aðstæðum hverju sinni en þó leggur aðeins meira upp úr líkamstjáningu og svipbrigðum á meðan á samskiptum stendur. Með markvissum þjálfunaraðferðum er mögulegt að styrkja menningargreind, hvort sem einblínt er á einn þátt eða alla fjóra. Til að bæta gæði og fagmennsku farþegaþjónustunnar á Íslandi er ekki úr vegi að skilgreina kröfur og væntingar viðskiptavina og styrkja menningargreind starfsmanna í samræmi við það. Menningargreind er talinn kostur í fari einstaklinga og getur menningargreindur mannauður mögulega stuðlað að aukinni samkeppnishæfni fyrirtækja