Hvernig birtast hugtök og markmið í gæðaviðmiðum frístundastarfs og hvaða merkingu hefur það fyrir fötluð börn?

Megin umfjöllunarefni þessarar heimildaritgerðar er að skilgreina og fjalla um hugtökin þátttaka, aðgengi og stuðningur í frístundastarfi án aðgreiningar. Rýnt var í skýrslu um gæðaviðmið frístundaheimila þar sem þessi hugtök birtast. Með því að skilgreina og fjalla sérstaklega um hugtök sem birtast í viðmiðum í frístundastarfi verður reynt að komast að því hvaða hlutverk frístundastarf hefur fyrir fötluð börn og hvernig þörfum þeirra er mætt í því starfi. Mismunandi er hvernig hver og einn túlkar notkun hugtaka og er því mikilvægt að sameiginlegur skilningur eigi sér stað um hvað felst í hverju atriði viðmiðanna. Þar sem hópur fatlaðra barna er viðkvæmur er einnig mikilvægt að skilgreining sé skýr svo þeirra réttur, sem og allra barna, sé ávallt virtur. Öll börn eiga rétt á sömu gæðum í frístundastarfi og vil ég benda á mikilvægi þess að viðurkenning sé á öllu starfandi frístundaúrræði og að kröfur og viðmið til frístundastarfs nái til allra úrræða. Viðfangsefni ritgerðarinnar varð fyrir valinu vegna mikils áhuga á að sjá fötluð börn hafa aðgang að innihaldsríku og fjölbreyttu frístundastarfi þar sem þau eru virkir þátttakendur og fá að njóta sín í styðjandi umhverfi