Hið fullkomna samband? Samband íþrótta og fjölmiðla frá félagsfræðilegu sjónarhorni

Í ritgerð þessari var lagt upp með að varpa ljósi á samband íþrótta og fjölmiðla. Í upphafi var fjallað um einkenni fjölmiðla og birtingarmynd íþrótta í fjölmiðlum. Þá var fjallað um sérstakt samband fjölmiðla og íþrótta og hvaða ávinning báðir aðilar hljóta af slíku sambandi. Vikið var sérstaklega að sambandi íþrótta við beinar útsendingar í sjónvarpi og sér í lagi knattspyrnu. Félagsfræðilegra skýringa var leitað á eftirspurn eftir beinum útsendingum í sjónvarpi. Því næst voru framkvæmdar tvær tilviksathuganir sem vörpuðu ljósi á þetta sérstaka samband, sem sumir kalla hið fullkomna samband. Fyrri tilviksathugunin laut að þróun enskrar knattspyrnu frá upphafi til dagsins í dag. Stofnun ensku úrvalsdeildarinnar var þar í brennidepli og sérstaklega fjallað um sjónvarpsréttinn á deildinni. Síðari tilviksathugunin fjallaði um þær umbreytingar sem urðu á evrópskri knattspyrnu við stofnun Meistaradeildar Evrópu. Að lokum var hugmyndum höfundar um efni ritgerðarinnar velt upp í umræðukafla og spáð fyrir um frekari þróun á sambandi íþrótta og fjölmiðla