Krafan um hagsmuni aðila. Lögvarðir hagsmunir eða aðildarskortur. Hvar liggja mörkin?

Í ritgerðinni eru settar fram þrjár spurningar. Í fyrsta lagi hver séu mörkin á milli reglunnar um lögvarða hagsmuni og aðildarskorts. Í öðru lagi hvort dómstólar hafi beitt reglunni um lögvarða hagsmuni þegar rétt hefði verið að beita aðildarskorti. Í þriðja lagi eru skoðuð rök með og á móti því hvort skýra eigi regluna um lögvarða hagsmuni svo rúmt að hún nái til sömu tilfella og aðildarskortur. Í fyrsta kafla er fjallað almennt um efni ritgerðarinnar og uppbyggingu hennar. Þá er einnig fjallað um meginregluna um aðgang manna að dómstólum. Í öðrum kafla er fjallað um regluna um lögvarða hagsmuni. Í þriðja kafla er fjallað um regluna um aðildarskort. Loks er spurningum ritgerðarinnar svarað í fjórða kafla