Börn sem verða vitni að ofbeldi á heimili

Það hefur tekið langan tíma að viðurkenna tilvist heimilisofbeldis þrátt fyrir að það þekkist um allan heim. Það virðist ríkja ákveðin þögn um þessa tegund ofbeldis og ekki er langt síðan farið var að rannsaka það. Á síðastliðnum áratugum hefur orðið vitundarvakning meðal almennings. Ofbeldi á heimili er yfirleitt ekki eitt ofbeldisatvik heldur endurtekur það sig og verður viðvarandi mynstur innan fjölskyldunnar. Í flestum tilfellum verða konur fyrir ofbeldinu og þá eru miklar líkur á að börn þeirra verði vitni að því. Með auknum rannsóknum hefur verið sýnt fram á þær afleiðingar sem börn verða fyrir þegar þau verða vitni að ofbeldi á heimilum en þær hafa lengi verið vanmetnar. Nú er talið að þegar barn verður vitni að ofbeldi á heimili sínu geti það jafngilt þeim áhrifum sem það hefur á barn að verða sjálft fyrir ofbeldi af einhverju tagi. Börn sem búa við ofbeldi á heimili sínu hafa þörf fyrir fullorðinn einstakling sem þau geta leitað til og fengið aðstoð og stuðning hjá til þess að takast á við reynsluna af ofbeldinu. Þegar kona er í hættu vegna ofbeldis á heimili bendir það oft til þess að barn sé líka í hættu vegna þess. Það að hjálpa konu sem verður fyrir ofbeldi á heimili þannig að hún verði örugg er oft besta leiðin til að sjá til þess að barnið verði einnig öruggt. Heimilisofbeldi er algengur þáttur í vanlíðan barna sem birtist fagfólki sem vinnur með varnarlausum börnum. Það er áhrifavaldur í vinnu félagsráðgjafa á mörgum sviðum