Rights in Aircraft

Réttindi í loftförum hafa að mörgu leyti sérstöðu gagnvart réttindum í öðru lausafé sem leiðir af því að um hreyfanlegar og mjög verðmætar eignir er að ræða. Í ritgerð þessari var einblínt á umfjöllun um skráningu réttinda í loftförum í innlendu og alþjóðlegu samhengi. Einnig var fjallað um úrræði handhafa réttinda yfir loftförum í tilviki vanefnda skuldara og gjaldþrots hans. Ritgerðin skiptist í tvo hluta en í fyrri hlutanum er fjallað um þær reglur sem gilda hér á landi um réttindi í loftförum en fjallað er um alþjóðlegar reglur í þeim síðari. Í umfjöllun um hinar alþjóðlegu reglur er einblínt á Höfðaborgarsáttmálann og bókun við hann sem varðar loftfarshluti. Sáttmálinn og bókunin voru undirrituð í Höfðaborg hinn 16. nóvember árið 2001 en þau tóku gildi árið 2006. Talið var að með undirritun Höfðaborgarsáttmálans og flugvélabókunarinnar væru tekin mikilvæg skref til að bæta upp fyrir hindranir sem kynnu að koma upp við fjármögnun loftfara, búnaðar í loftförum og þyrlna í alþjóðlegri starfsemi. Þannig var talið að sáttmálinn og bókunin myndu skapa viðunandi skráningarkerfi og úrræði fyrir lánardrottna og leigusala, sem njóta réttinda yfir loftförum. Helstu nýmæli að þessu leyti felast í því að mælt er fyrir um stofnun alþjóðlegrar réttindaskrár, þar sem þau réttindi sem heyra undir sáttmálann verða skráð. Í lok ritgerðarinnar eru svo settar fram hugleiðingar um mögulega innleiðingu Höfðaborgarsáttmálans og flugvélabókunarinnar í íslenskan rétt