Viðhorf millistjórnenda til starfsumhverfis og áhrif þess á starfsánægju þeirra : fjórir þroskaþjálfar í skólakerfinu lýsa reynslu sinni

Markmið verkefnisins er að kanna starfsánægju þroskaþjálfa sem hafa það sameiginlegt að vera millistjórnendur og lýsa viðhorfum þeirra til ýmissa þátta í starfsumhverfinu. Fjallað verður um hlutverk millistjórnenda og hvaða eiginleikum leiðtoga og hæfnissviðum tilfinningagreindar er ákjósanlegt að þeir búi yfir. Rannsóknin er eigindleg og voru tekin viðtöl við fjóra lykilþátttakendur sem störfuðu allir sem þroskaþjálfar innan skólakerfisins. Þeir áttu það sameiginlegt að vera millistjórnendur. Niðurstöður rannsóknarinnar draga fram þá þætti sem viðmælendum mínum fannst skipta mestu máli um áhrif starfsumhverfis á starf, þeirra, starfsvettvang og starfsánægju. Niðurstöðurnar benda til þess að samskipti séu einn af aðal áhrifavöldum starfsánægjunnar. Starfsánægjan er minni ef þessi þáttur og það samspil sem skapast á milli samstarfsfélaga og yfirmanna er ekki í lagi. Í niðurstöðum kemur það fram að virðing, traust og jákvæð samskipti séu mikilvægar forsendur starfsánægjunnar. Öllum viðmælendum mínum fannst vinnan með nemendunum gefa þeim mikla starfsánægju en tímaleysi drægi úr henni, þar sem viðmælendum mínum fannst það skipta miklu máli að þjónusta nemendurna vel. Niðurstöðurnar benda einnig til þess að það þurfi að standa vörð um sérhæfingu þroskaþjálfa, ekki síst vegna þess að starfshættir þeirra skarast við svið annarra stétta sem starfa á sama starfsvettvangi. Þá töldu viðmælendur mínir að virðing fyrir starfinu og öryggi í vinnubrögðum væru þættir sem hefðu áhrif á ánægju í starfi. Þá sögðu þeir að góða starfsaðstöðu mikilvæga. Þessir þættir virðast skipta mestu máli hjá þátttakendum mínum þegar áhrif starfsumhverfis voru skoðuð með hliðsjón af ánægju í starfi