Samband vinnustunda og framleiðni vinnuafls: Greining á 20 ríkjum innan OECD

Á síðastliðnum áratugum hafa orðið umfangsmiklar breytingar á hefðbundnum vinnutíma meðal íbúa OECD ríkja. Slíkar breytingar geta gjarnan leitt til breytinga á öðrum hagrænum þáttum hvort sem að þær snerta tiltekinn hóp íbúa eða hagkerfin í heild sinni. Eins og staðan er nú þjáist Ísland af þeim vafasama titli að vera með lægstu framleiðni Norðurlandanna og meðal þeirra ríkja sem búa við lægstu framleiðni innan OECD. Þrátt fyrir það er verg landsframleiðsla á mann hérlendis með því hæsta sem þekkist og sama gildir um launastig, sem er verulega óvenjulegt þar sem að þessir þættir haldast gjarnan í hendur þegar framleiðni aðfanga er skoðuð. Þessi velmegun sem landið getur státað sig af er aðallega af þeirri ástæðu að hagkerfið er drifið áfram með óhóflegum fjölda vinnustunda en Ísland er sú þjóð sem ver lengstum tíma til vinnu allra Norðurlanda og er einnig yfir meðaltali OECD. Þess vegna hefur umræðan um styttingu vinnuvikunnar verið í deiglunni síðastliðin ár. Er möguleiki að íbúar geti skilað meiri verðmætum til hagkerfisins ef þeir verja styttri tíma við að búa þau til? Reynt verður að meta hvort að samband sé á milli vinnustunda og framleiðni vinnuafls og svo verða dregnar ályktanir af niðurstöðum tölfræðiathugunar. Í ljósi hennar verður skoðað hvort að fækkun vinnustunda sé boðleg fyrir Ísland og önnur lönd sem búa við framleiðniskort