Orkumál í Kína Umhverfisáhrif af orkuöflun og orkunýtingu

Allt þar til á síðustu áratugum lifðu flestir kínverjar nokkuð sjálfbæru lífi í sveitum landsins og orkunotkun takmarkaðist við almennt heimilishald og búrekstur. Undanfarin ár og áratugi hafa sífellt fleiri flutt til borganna í leit að betra lífi og hefur daglegt líf milljóna manns þar með breyst og gera þeir sífellt meiri kröfur um þau lífsgæði sem við hér á vesturlöndum teljum sjálfsögð. Með aukinni kröfu vesturlandabúa um ódýran neysluvarning í miklu magni, hefur það síðan einnig færst í vöxt að við hér á vesturlöndum höfum farið að láta framleiða töluvert af okkar neysluvarningi í þróunarlöndunum, m.a. í Kína, en það skapar mun fleiri og betur borguð störf fyrir Kínverja og hagur margra þeirra hefur vænkast í framhaldi af því. Með aukini hagsæld almennings fara töluvert mikið fleiri kínverjar að nota orku í mun meira mæli við daglegt líf, og þá orku verður að framleiða með einhverjum leiðum. Aukna orku þarf einnig að framleiða til að knýja áfram allar verksmiðjurnar, auk þess sem það þarf orku til að flytja allan varninginn á milli staða. Hingað til hefur megnið af þeirri orku sem menn nota í Kína verið framleitt með bruna á kolum og öðru jarðefnaeldsneyti ásamt bruna á lífmassa til daglegra nota, en vegna mikillar mengunar er ljóst að það gengur ekki mikið lengur og því þurfa Kínverjar nauðsynlega að fara að finna sér aðra orkugjafa. Það að hagkerfi landsins skuli vera knúið áfram með brennslu kola, er ein stærsta ástæðan fyrir þeim ógöngum sem umhverfismál kínverja eru komin í, en kínverjar þurfa orku og þeir verða að fá hana einhverstaðar. Í þessari ritgerð er ætlunin að skoða helstu orkugjafa sem notaðir eru í Kína samtímans og áhrif af notkun og vinnslu þessara orkugjafa á umhverfi landsins. Einnig er ætlunin að skoða hvaða orkumöguleika Kínverjar gætu hugsanlega nýtt sér í framtíðinni.Engi