Sveigjanlegur vinnutími í íslenska hugbúnaðargeiranum: Upplifun starfsmanna á sveigjanlegum vinnutíma.

Ritgerð þessi fjallar um ávinning starfsmanna og skipulagsheilda að bjóða upp á sveigjanlegan vinnutíma. Markmið ritgerðarinnar er að fanga upplifun starfsmanna sem vinna við sveigjanlegan vinnutíma og þeirra skoðun á ávinningi bæði þeirra og skipulagsheildarinnar sem þeir starfa fyrir þess að boðið sé upp á sveigjanlega vinnutíma. Ritgerðin er innlegg inn í þá umræðu að bjóða upp á sveigjanlega vinnutíma og reynir að svara þeim spurningum sem kunna að vakna upp er skipulagsheildir íhuga að innleiða sveigjanlegan vinnutíma. Rannsóknarspurningarnar eru tvær og eru eftirfarandi: „Eru starfsmenn þeirrar skoðunar að það sé gagnkvæmur ágóði fyrir starfsmenn og skipulagsheildir að þeim sé treyst fyrir meiri sveigjanleika í eigin starfsfyrirkomulagi?” (og) „Hvað telja starfsmenn að ágóðinn sé af þessu fyrirkomulagi?”Rannsóknin var eigindleg og var aðeins stuðst við gögn frá viðtölum við átta viðmælendur sem eiga það allir sameiginlegt að vinna við sveigjanlegan vinnutíma. Var sú ákvörðun tekin að finna viðmælendur sem vinna í hugbúnaðargeiranum í ljósi þess að hann er þekktur fyrir að hafa lengi boðið upp á sveigjanlega vinnutíma. Einnig var markmiðið að festa sig ekki við eina skipulagsheild og skoða hvernig hún vinnur heldur fanga breiðari mynd af ávinningi sveigjanlegs vinnutíma og bera saman fyrirkomulag í mörgum skipulagsheildum. Kynjahlutfall viðmælenda var jafnt og var starfsaldur viðmælenda innan hugbúnaðargeirans allt frá nokkrum mánuðum upp í yfir þrjátíu ár. Niðurstöður rannsóknarinnar sýna tvímælalaust að það sé gagnkvæmur ávinningur af því að bjóða upp á sveigjanlegan vinnutíma. Með sveigjanlegum vinnutíma gefst tækifæri til að draga úr togstreitu sem er á milli vinnu og heimilis sem leiðir til þess að starfsfólk upplifir minna stress og meiri starfsánægju. Er það skoðun viðmælendanna að ánægðara starfsfólk hefur margskonar jákvæð áhrif á skipulagsheildina. Má þar nefna lækkun kostnaðar, aukin afköst o.fl. Þau atriði sem komu fram í niðurstöðum sem hafa bein áhrif á skipulagsheildina eru að skipulagsheildin verður eftirsóknaverðari vinnustaður og skipulagsheildin fær traustara starfsfólk. Hvernig staðið er að sveigjanlegum vinnutíma skiptir gríðarlegu máli. Kom það fram í niðurstöðum að skipulagsheildir þurfa fyrst og fremst að beina athygli sinni að verkefnum starfsmanna en ekki á atriði eins og mætingu. Var að skoðun viðmælenda að ef starfsfólk skilar af sér verkefnunum þá á mæting ekki að skipta máli