Starfsmannasamtalseyðublöð, formgerð og þróun þeirra á undanförnum árum

Notkun starfsmannasamtala við stjórnun mannauðs fer sífellt vaxandi hér á landi og getur slíkt tæki haft áhrif á það hvernig og hvort frammistaða og árangur næst innan skipulagsheilda. Ef starfsmannasamtalið og þau eyðublöð sem notuð eru til samtalsins eru vel hönnuð, undirbúningur faglegur og samtalið framkvæmt á faglegan máta eykur það sambandið á milli yfirmanns og starfsmannsins. Þessari ritgerð er ætlað að varpa ljósi á starfsmannasamtalseyðublöð, formgerð þeirra og þróun í takt við þróun starfsmannasamtalsins, eins af mikilvægustu verkfærum mannauðsstjórnunar hin síðari ár. Ritgerðinni er skipt upp í tvo hluta. Fyrri hluti ritgerðarinnar byggist á fræðilegu yfirliti um mannauðsstjórnun, frammistöðustjórnun og að síðustu sjálft starfsmannasamtalið, þróun og framkvæmd þess í víðum skilningi. Síðari hluti ritgerðarinnar fjallar um rannsókn sem undirrituð gerði á samtalseyðublöðum og þróun þeirra. Rannsóknin fór fram með eigindlegri rannsóknaraðferð á fyrirliggjandi gögnum sem rannsakandi aflaði frá aðilum á íslenskum vinnumarkaði. Lögð var áhersla á að rýna í og leggja mat á þróun og formgerð samtalseyðublaðanna. Rannsóknin er tilviksrannsókn og er henni ætlað að varpa ljósi á ákveðin tilvik en hún hefur ekki beint yfirfærslu- eða alhæfingargildi. Leitast var við að svara því hvort breyting hafi orðið á formgerð starfsmannasamtalseyðublaða á undanförnum árum og hvort þær breytingar séu í takt við þróun starfsmannasamtala út frá mannauðsfræðunum. Niðurstöður rannsóknarinnar gáfu til kynna að starfsmannasamtalseyðublöðin hefðu breyst og væru sífellt í þróun í tengslum við bæði þróun mannauðsstjórnunar sem og í tengslum við þá afurð sem skipulagsheildir krefjast af starfsmannasamtalsforminu. Fyrst lögðu samtalseyðublöðin áherslu á frammistöðu og voru tengd starfsþáttum og starfsánægju, þá breyttust þau yfir í að einblína á starfsþróun og að lokum í samtalseyðublöð með mælanlegum kvörðum þar sem áhersla er lögð á framtíðarmarkmið og frammistöðu út frá gildum skipulagsheildarinnar. Huglægt mat og spurningar um viðhorf starfsfólks eru á undanhaldi og frekar er byggt á mælanlegum þáttum um frammistöðu og markmið þar sem notast er við kvarða við svörun