Líkamsmynd karlmanna og innfæring samfélagsgilda um útlit. Áhrif frægra og óþekktra einstaklinga

Í þessari rannsókn var reynt að framkalla skammtímaáhrif mismunandi áreita á líkamskvíða hjá karlmönnum með því að láta þá skoða ljósmyndir. Einnig var samband á milli líkamskvíða og innfæringar skoðað. Þátttakendum var skipt upp í þrjá hópa. Hópi 1 (n=61) voru birtar myndir af frægum karlmönnum með óskalíkama, hópi 2 (n=62) voru birtar myndir af óþekktum karlmönnum með óskalíkama og hópi 3 (n=56) voru birtar hlutlausar myndir af snjallsímum. Þátttakendur voru beðnir að meta auglýsingagildi myndanna til að fela tilgang rannsóknarinnar. Allir hópar svöruðu síðan spurningum um líkamskvíða og innfæringu samfélagsgilda um útlit. Tilgátur rannsóknarinnar voru: (1a) Þeir sem sjá myndir af frægum karlmönnum með óskalíkama munu mælast hærra á líkamskvíða heldur en þeir sem sjá myndir af óþekktum karlmönnum með óskalíkama og myndir af snjallsímum. (1b) Þeir sem sjá myndir af óþekktum karlmönnum með óskalíkama munu mælast hærra á líkamskvíða heldur en þeir sem sjá myndir af snjallsímum. (2) Þeir sem mælast hátt á innfæringarskala munu mælast hærra á líkamskvíða en þeir sem mælast lágt á innfæringarskala. Ekki fannst marktækur munur á líkamskvíða á milli hópa. Því var ekki hægt að segja að ein tegund af áreiti hefði meiri áhrif á líkamskvíða en annað. Hins vegar mældist fylgni á milli innfæringar og líkamskvíða sem þýðir að einstaklingur sem hefur innfært samfélagsleg gildi um útlit er líklegri til þess að finna fyrir líkamskvíða vegna áhrifa staðalmynda