Ný framtíðarsýn fagstéttar þroskaþjálfa í fjórum löndum Evrópu

Í erindinu verður gerð grein fyrir niðurstöðum rannsóknar sem unnin var á tímabilinu 2014 og 2015. Rannsóknin er hluti langtímarannsóknar á stöðu menntunar og starfa íslenskra þroskaþjálfa í alþjóðasamhengi sem hófst árið 2013. Í þessum hluta rannsóknar er gerður samanburður á framtíðarsýn fagstéttar þroskaþjálfa hérlendis og í þremur öðrum löndum, þ.e. Noregi, Danmörku og Spáni. Leitast er við að svara hver sýn fagstéttarinnar og væntingar eru til þróunar starfa sinna og hlutverka á komandi árum. Rannsóknin er byggð á viðtölum við forystuaðila fagstéttarinnar í umræddum löndum, ásamt greinaskrifum og yfirlýsingum fagfélaga þroskaþjálfa sem birst hafa í fagtímaritum og öðrum sérritum. Í þessum hluta er sjónum sérstaklega beint að niðurstöðum frá nýliðnum starfsdögum Þroskaþjálfafélags Íslands en viðfangsefni þeirra var framtíðarsýn félagsmanna. Niðurstöður frá starfsdögum styrkja fyrri niðurstöður langtímarannsóknar, og varpa skýrara ljósi á stöðu og áskoranir stéttarinnar hérlendis, og þann samhljóm sem stéttin á með samanburðarþjóðunum. Jafnframt varpa þær ljósi á þætti sem að sama leyti sérkennir fagstéttina hérlendis. Fagstétt íslenskra þroskaþjálfa er í meginatriðum samhljóma þeim erlendu þegar horft er til framtíðar, sérstaklega varðandi þróun menntunar og þörf fyrir rannsóknir á störfum þroskaþjálfa. Þá er fagstéttin einróma um að þörf verði fyrir fagþekkingu þroskaþjálfa á æ breiðari samfélagsvettvangi en nú er