Hvað þurfa markaðsstjórar að kunna og geta?

Ritgerð þessi samanstendur af fræðilegu efni þar sem fræðasvið markaðsfræðinnar er kynnt í víðum skilningi. Þróun markaðsfræðinnar er rakin, greint er frá rannsóknum sem gerðar hafa verið á áhrifum markaðsstarfs á árangur fyrirtækja og síðan er hugtökum um hæfni, þekkingu og kunnáttu gerð skil og skerpt frekar á rannsóknum á þeim þáttum. Þá er einnig vikið að þeirri aðferðafræði sem stuðst var við í rannsóknarvinnunni en ritgerðin byggir á eigindlegri rannsókn sem gerð var meðal tíu markaðsstjóra í 100 stærstu fyrirtækjum landsins samkvæmt lista Frjálsrar verslunar árið 2009. Tilgangur rannsóknarinnar var að fræðast um sjónarmið markaðsstjóra sjálfra á því hvað varðaði þá þekkingu og kunnáttu sem þeir teldu mikilvæga til að sinna starfi sínu og leitast var við að svara rannsóknarspurningunni: Hvaða hæfni telja markaðsstjórar að þeir þurfi að hafa til að bera til að ná árangri í starfi? Að lokum eru niðurstöður rannsóknarinnar kynntar og umfjöllun um þær. Helstu niðurstöður eru þær að viðmælendur telja almenna stjórnendahæfni svo sem mannleg samskipti og tjáningafærni skipta mestu máli í starfi markaðsstjóra og vera forsendu þess að ná góðum árangri, þar sem samvinna við aðrar deildir, yfirstjórn og samstarfsaðila væri stór þáttur í starfi markaðsstjóra. Töldu þeir að meginforsenda öflugs markaðsstarfs væri innleiðing markaðshneigðar í fyrirtæki þar sem væri til staðar stuðningur yfirmanna og stjórnar sem og samspil allra samstarfsmanna. Markaðsstjórar mátu menntun í markaðsmálum ekki mikils en töldu þó nauðsynlegt að búa yfir ákveðinni þekkingu á kenningum markaðsfræðinnar en voru þeirra skoðunar að til að öðlast hæfni í markaðsmálum þá þyrftu þeir að öðlast reynslu en reynslan kæmi með tímanum sem varið væri í starfi