Markaðsfærsla körfuknattleiks hjá KKÍ og aðildarfélögum þess

Íslenskur körfuknattleikur hefur eflst á undanförnum árum að gæðum og umfangi. Í kjölfar mikillar umfjöllunar um íþróttina og íslenska karlalandsliðið í körfuknattleik sem tryggði sér þátttökurétt í úrslitakeppni landsliða á Evrópumótinu (EM) setti KKÍ af stað kynningarverkefnið „Komdu í körfu“ sem hefur staðið yfir í rúmt ár. Árangurinn í körfuknattleik á hinu alþjóðlega sviði og aukin umfjöllun var nýtt sem grunnur að verkefninu til að fá fleiri til að prufa körfuknattleik. Efni þessa meistaraverkefnis er markaðsfærsla körfuknattleiks hjá Körfuknattleikssambandi Íslands (KKÍ) sem var skoðuð með þeim hætti að gerð var megindleg könnun meðal hagsmunaaðila innan sérsambandsins um skipulagsþætti körfuknattleiks á Íslandi ásamt því að eigindleg könnun var gerð á yfirstandandi kynningarverkefni KKÍ sem hefur það markmið að fjölga körfuknattleiksiðkendum á Íslandi. Könnunin leiddi í ljós að almenn ánægja er með skipulagsþætti KKÍ varðandi leiki og mótahald. Þó gæti sambandinu gagnast að einbeita sér að því að bæta álit neytenda á dómurum og þjálfurum, t.d. með aukinni fræðslu og menntun þeirra. Út frá niðurstöðum greiningar og yfirliti fræðanna sést að KKÍ hefur staðið sig vel í kynningarátakinu en gæti gert margt betur. Skipulag hefði mátt vera betra og árangur í verkefninu hefði mátt meta með markvissari og mælanlegri hætti og með fleiri aðferðum en því að skoða iðkendatölur fyrir og eftir verkefnið og almennt umtal um körfuknattleik hérlendis