Lýðræði nútímans: Er lýðræðið í tilvistarhættu?

Lýðræðið hefur tekið miklum breytingum í gegnum tíðina og lýðræðiskenningar eru eins margar og þær eru mismunandi. Lýðræðisskipulag nútímans grundvallast að mestu leyti á hugsjónum frjálslyndrar lýðræðisstefnu, en það virðist um þessar mundir eiga undir högg að sækja vegna uppgangs lýðhyggju. Að sama skapi virðist sem aukin skautun stjórnmálanna og aukið vantraust kjósenda í garð þeirra leiði til frekari óstöðugleika og grafi undan lögmæti skipulagsins. Þessi vandamál eru afleiðing nýlegra þjóðfélagsbreytinga og þeirrar óánægju sem myndast hefur í kjölfar þeirra. Hluti almennings telur núríkjandi skipulag ekki taka tillit til krafna sinna og þarfa með fullnægjandi hætti. Það ber því minna traust til þess og verður berskjaldað fyrir skautaðri hugmyndastefnu og orðræðu lýðhyggju. Þó er lýðræðið sjálft enn eftirsóknarvert í huga allflestra og því má ekki leggja andstöðu við núverandi skipulag að jöfnu við andstöðu við lýðræðið sjálft. Til að svara því hvort lýðræðið sé í tilvistarhættu er ekki síður mikilvægt að taka tillit til ólíkra hugmynda um hugtakið, þar sem tilteknar lýðræðishugmyndir eiga vissulega undir högg að sækja, en aðrar ekki. Þrátt fyrir allt þykir þó líklegra að rótgrónar stofnanir frjálslynda lýðræðisskipulagsins standi fyrirliggjandi öldugang af sér