Ástæður skilnaða og sambúðarslita. Ýmsir tilgreindir áhættuþættir fráskilinna hjóna og para sem skildu eða slitu sambúð hjá sýslumanninum í Reykjavík

Markmið rannsóknarinnar var að afla upplýsinga um hvað fráskilið fólk teldi að leitt hefði til skilnaðarins. Tilgreindar orsakir þátttakenda voru meðal annars skoðaðar með tilliti til kyns og menntunar. Skoðað var hvort núverandi hjúskaparstaða þátttakenda tengdist því hversu sáttur viðkomandi var við þá ákvörðun að skilja; tengslamyndun (attachment style) og lífsgæðum hans. Helstu niðurstöður sýndu að þær ástæður sem fólk tilgreinir oftast eru sambærilegar þeim sem fram koma í erlendum rannsóknum eins og að viðkomandi áttu ekki lengur samleið, ástleysi, samskiptaerfiðleikar, ágreiningur um forgangsröðun heimilis, fjölskyldu og frístunda og áfengis-og fíkniefnavandamál. Konur tilgreindu framhjáhald maka, áfengis-og vímuefnavandamál maka og andlegt ofbeldi maka oftar en karlar. Þeir sem eru einhleypir þegar spurningalistanum var svarað tilgreindu frekar framhjáhald maka síns sem orsök skilnaðar en þeir sem voru komnir í nýtt samband. Meirihluti foreldra þátttakenda hafði ekki skilið eða slitið sambúð sem er ekki sambærilegt við erlendar niðurstöður. Samkvæmt niðurstöðunum virðist ágreiningur um forgangsröðun heimilis, fjölskyldu og frístunda vera stór áhættuþáttur fyrir skilnaði og er oftar tilgreindur af konum en körlum. Draga má þá ályktun að aðkoma sérfræðinga að vandamálum í parasambandi gæti verið mjög árangursrík þar sem helstu vandamálin tengjast hegðun og tilfinningum