Tengsl foreldra og barna í stjúpfjölskyldum

Meginmarkmið þessarar ritgerðar er að skoða tengsl milli foreldra og barna í stjúpfjölskyldum. Hvort og þá hvernig skilnaður og nýtt parasamband hefur áhrif á þau. Tengsl sem myndast á milli foreldra og barna leggja grunn að framtíð barnanna og hafa áhrif á þroska og velferð einstaklingsins. Við skilnað og myndun nýrrar stjúpfjölskyldu geta þessi tengsl orðið fyrir áhrifum, bæði góðum og slæmum. Við skilnað eykst álag á fólki og þær venjur sem höfðu myndast í sambandinu riðlast, breytingar verða á daglegum venjum og barn upplifir að jafnaði kvíða og sorg þegar foreldrar þess skilja en stundum finna þau fyrir vissum létti, til dæmis ef mikið ofbeldi hefur verið á heimilinu. Börn geta verið sett í þá stöðu með einhleypu foreldri að fullnægja tilfinningalegum þörfum þess, meira en eðlilegt þykir. Hvernig foreldrum tekst að aðlaga líf sitt að nýjum fjölskylduaðstæðum eftir skilnað getur haft áhrif á hvernig tekst til að mynda stjúpfjölskyldu. Börn upplifa það oft á tíðum að þegar nýtt stjúpforeldri kemur inn í fjölskylduna þurfi það að keppa um athygli kynforeldris síns, það finnst það skipta minna máli og að það fái minni tíma með foreldri sínu