Hámörkun við töfluslátt

Úðaþurrkun er þekkt aðferð til að bæta eiginleika dufts fyrir töfluslátt. Í úðaþurrkun er ýmislegt sem þarf að hafa í huga til að fá duft með æskilega eiginleika, til dæmis hvaða hjálparefni á að nota með virka efninu, hver styrkur lausnar eigi að vera og hvaða stillingar úðaþurrkara eigi að nota. Mikilvægt er að notast við góða tilraunahönnun þegar þetta er rannsakað. Markmið verkefnisins var að hámarka afköst úðaþurrkara fyrir töfluslátt með tilraunahönnun Modde. Notast var við virka efnið paracetamól þar sem erfitt er að slá töflur úr því og því hentugt að þróa aðferð til að bæta eiginleika þess með úðaþurrkun. Fyrst voru skimunarrannsóknir gerðar til að velja hentuga fjölliðu og í kjölfarið hámarkunarrannsókn fyrir úðaþurrkara. Valin var hentug aðferð til að stærðarmæla agnir og töflur slegnar úr þremur mismunandi framleiðslum. Að lokum voru prófanir gerðar á töflum samkvæmt Evrópsku lyfjaskránni til að meta eiginleika þeirra. Póvídón reyndist hentugasta fjölliðan samkvæmt skimunarrannsóknum og var því notuð í hámörkunarrannsókn með paracetamóli. Hámörkunarrannsóknin veitti upplýsingar um áhrif einstakra þátta á útkomur ásamt samverkandi og ólínulegum áhrifum. Úr hámörkunarrannsókninni fengust einnig upplýsingar um hvaða stillingar gæfu annars vegar hámarks og hins vegar lágmarks agnastærð ásamt því að nýtni var hámörkuð og lengd keyrslu lágmörkuð. Slegnar voru töflur og bornar saman við blöndu sem var ekki úðaþurrkuð. Töflur úr úðaþurrkuðum efnum komu betur úr prófunum en töflur úr blöndu sem var ekki úðaþurrkuð