Vanræksla barna. Orsakir, afleiðingar og forvarnir

Í ritgerðinni er fjallað um vanrækslu barna. Gert verður grein fyrir kenningum sem tengjast vanrækslu barna, skilgreiningu á misbresti í uppeldi og vanrækslu, flokka vanrækslu, helstu orsakir og afleiðingar, forvarnir gegn vanrækslu og vernd barna í kerfinu. Leitast verður við að svara hverjir séu helstu áhættuþættir og orsakir vanrækslu, helstu afleiðingar hennar og hvernig unnið er að forvörnum á Íslandi þegar kemur að vanrækslu. Niðurstaða ritgerðarinnar er sú að það eru ýmsir áhættuþættir sem geta orsakað vanrækslu, þeir helstu eru ungur aldur foreldra, fjölskyldugerð og stærð fjölskyldu. Vanræksla getur haft verulega slæmar afleiðingar fyrir börn sem fyrir henni verða. Börn geta upplifað skamm- og langtíma afleiðingar í kjölfar vanrækslu sem geta komið fram í félagslegum-, tilfinningalegum-, vitsmunalegum-, líkamlegum- og hegðunarvandkvæðum. Forvörnum mætti beita í meira mæli gegn vanrækslu hér á landi. Mikilvægt er að allir foreldrar fái stuðning og fræðslu um foreldrahlutverkið en hinsvegar fá foreldrar slíkan stuðning í litlum mæli hér á landi. Með því að veita foreldrum frekari stuðning og fræðslu er mögulega hægt að draga úr vanrækslu. Aðgengi að upplýsingum um foreldrisfærnisnámskeið þurfa að vera sýnilegri og auka þarf framboð af námskeiðum og fræðslu fyrir foreldra. Foreldrafærnisnámskeið gætu til dæmis verið hluti af mæðravernd fyrir verðandi foreldra en með því gætu allir verðandi foreldrar farið á slíkt námskeið. Meiri vitundavakning þarf að vera í samfélaginu um vanrækslu barna og upplýsa þarf einstaklinga betur um tilkynningarskyldu sína. Ef fólk er upplýstara um tilkynningarskylduna er það líklegra til að tilkynna þegar grunur vaknar um að barn sé vanrækt. Á þann hátt er mögulega hægt að draga úr vanrækslu barna