Þol framhaldsskólanemenda

Þol er einn mikilvægasti þáttur við uppbyggingu á heilsu og tengist allri líkamlegri hreyfingu einstaklinga. Þol hefur áhrif á stoð- og taugakerfi, hjarta- og öndunarstarfsemi, blóðrás og efnaskipti og hefur því mikil áhrif á líffræðilega starfsemi. Þegar þol einstaklinga er kannað, meðal annars með ýmsum þolprófum, þá er virkni allra þessara kerfa könnuð. Markmið þessarar rannsóknar er að kanna þol framhaldsskólanemenda í einum framhaldsskóla á Íslandi með því að skoða afkastagetu nemenda í 12 mínútna hlaupaprófi, svonefndu Cooper þolprófi yfir langan tíma. Verkefni þetta felst í greiningu á niðurstöðum mælinga sem áttu sér stað á árunum 2001–2014. Í rannsókninni var notast við megindlega rannsóknaraðferð. Þátttakendur voru samtals 277, þar af 138 drengir og 139 stúlkur. Frammistaða nemenda í Cooper þolprófi var borin saman við alþjóðleg viðmið með tilliti til kyns og aldurs nemenda. Niðurstöður rannsóknarinnar sýndu að þol nemenda mælt með Cooper þolprófi versnar við lok fjögurra ára námstíma borið saman við upphaf námsins (p=0,041). Stúlkur standa sig hlutfallslega betur í upphafi framhaldsskólagöngu samanborið við drengi en þeir standa sig hlutfallslega betur en stúlkur við lok framhaldsskóla miðað við alþjóðleg viðmið á Cooper þolprófi. Niðurstöður þessarar rannsóknar samanborið við rannsóknir fyrri ára sýna jafnframt að þol hjá framhaldsskólanemendum virðist fara versnandi. Þessi rannsókn styður þær tilgátur. Rannsóknin sýnir að einungis rúmlega þrír af hverjum fimm nemendum eru með þol sem telst í meðallagi eða betra miðað við alþjóðleg viðmið. Önnur sex ára gömul íslensk rannsókn sýndi fram á að rúmlega fjórir af hverjum fimm nemendum eru með þol sem telst í meðallagi eða betra miðað við alþjóðleg viðmið. Þar að auki er þoltala framhaldsskólanemenda í þessari rannsókn lægri en í öðrum íslenskum rannsóknum. Af þessu má draga þá ályktun að æskilegt sé að bregðast við slakri afkastagetu framhaldsskólanemenda með aukinni daglegri hreyfingu á skólatíma. Þörf er á frekari rannsóknum á þoli framhaldsskólanemenda samhliða breyttri námsskipan nýrrar aðalnámskrár