Markaðssamskipti, miðlar og markhópar. Hvaða samskiptaleiðir eru ríkjandi í markaðssetningu bankanna?

Miklar breytingar hafa átt sér stað í markaðsumhverfinu á Íslandi undanfarin ár vegna hratt vaxandi tækni auk ýmissa líffræðilegra og eðlislegra þátta. Þarfir markaðarins eru orðnar flóknari, samkeppnin meiri, kaupendur kröfuharðari og krefjast þeir sérhæfðari lausna. Bankarnir, eins og önnur fyrirtæki og stofnanir, hafa þurft að takast á við miklar áskoranir til að bregðast við þessum breytingum og hefur markaðssetning spilað þar stórt hlutverk. Mikilvægt er að greina markaðinn og flokka hann í minni markhópa svo auðveldara sé að eiga í samskiptum við neytendur og þannig þjóna þeim með skilvirkari hætti. Samskiptin tengja fyrirtæki og neytendur saman í gegnum ýmsar kynningarleiðir sem miðla upplýsingum til viðskiptavina og gera þeim kleift að mynda álit á fyrirtækinu eða þjónustu þess. Samskiptin geta haft áhrif á hugsanir og hegðun neytenda og eru markaðssamskipti þannig grundvallar þáttur markaðssetningar. Tilgangur ritgerðarinnar er að kanna hvaða leiðir markaðssamskipta eru færar til að koma skilaboðum á framfæri við neytendur í breyttu markaðsumhverfi og greina hvaða samskiptaleiðir séu ríkjandi í markaðssetningu bankanna. Tekin voru saman gögn um eftirtekt og áreiti mismunandi miðla í markaðssamskiptum bankanna og jafnframt lagt mat á það hvort þær samskiptaleiðir væru að ná til neytenda eða ólíkra markhópa bankanna með skilvirkum hætti. Framkvæmd rannsóknarinnar var megindleg en stuðst var við eigindlega rannsóknaraðferð að hluta. Megindlega rannsóknaraðferðin fólst í spurningakönnun sem send var á netföng allra nemenda í grunnnámi við Háskóla Íslands, auk þess sem henni var dreift á samfélagsmiðlinum Facebook. Eigindlega rannsóknaraðferðin byggðist á spurningalista sem sendur var í tölvupósti til forsvarsmanna markaðsmála hjá þremur stærstu bönkum landsins: Arion banka, Íslandsbanka og Landsbankanum. Niðurstöður ritgerðarinnar benda til þess að stafrænir miðlar, svo sem Internetið og samfélagsmiðlar, séu ríkjandi samskiptaleiðir bankanna ásamt hinum hefðbundna útimiðli. Neytendur töldu áreitið ekki vera mikið, en það var þó mest á samfélagsmiðlinum Facebook þar sem eftirtektin var einnig mest