Réttur hluthafa til skaðabóta vegna markaðsmisnotkunar.

Viðfangsefni þessarar ritgerðar er að skoða lagalegan rétt almennra hluthafa í skráðum hlutafélögum til skaðabóta vegna markaðsmisnotkunar stjórnenda eða ráðandi hluthafa í slíku félagi. Mikilvægur liður í því að endurreisa traust hins almenna fjárfestis á skipulegum verðbréfamarkaði er að leiða í ljós hvaða bótaúrræði standa honum til boða ef hann verður fyrir fjártjóni vegna markaðsmisnotkunar. Álykta má að ef bótaúrræðin eru skýr þá muni fyrirsjáanleiki þeirra bæði auka aðhald gagnvart stjórnendum félaga og einnig auka vilja hins almenna fjárfestis til að taka þátt í hlutabréfaviðskiptum á skipulegum verðbréfamarkaði. En þátttaka almennings í skipulegum verðbréfamarkaði er ein forsenda þess að sá markaður sé blómlegur. Í upphafi ritgerðarinnar er stuttlega fjallað um félagarétt og helstu einkenni hans, einkum í samhengi við réttindi og skyldur hluthafa. Síðan er vikið að skaðabótaábyrgð í félagarétti, hverjir geta sætt skaðabótaábyrgð og að hvaða skilyrðum uppfylltum. Í þriðja kafla ritgerðarinnar fjallar höfundur almennt um verðbréfamarkaðsrétt, hvaða lög og reglur gilda um skipulegan verðbréfamarkað og hvaða kröfur eru gerðar til skráðra félaga á opinberum markaði. Því næst er, í fjórða kafla ritgerðarinnar, markaðsmisnotkunarhugtakinu gerð ítarleg skil og fjallað um þróun markaðsmisnotkunar í löggjöf hér á landi sem og erlendis. Í fimmta kafla ritgerðarinnar er síðan fjallað með ítarlegum hætti um rétt hluthafa til skaðabóta þegar um markaðsmisnotkun er að ræða, hver möguleg úrræði hans eru til bóta, hvert beina skuli skaðabótakröfunni og loks hvernig sönnun um umfang tjónsins er háttað. Í fimmta kafla er jafnframt farið yfir helstu skilyrði skaðabótaábyrgðar samkvæmt íslenskum rétti og hvaða reglur gætu verið grundvöllur skaðabótaábyrgðar. Til skýringarauka verður fjallað um réttarframkvæmdina í Bandaríkjunum í tengslum við hópmálsóknarmál vegna verðbréfasvika og einnig tæpt á helstu sjónarmiðum í evrópskum rétti, þ.á.m. í norrænum rétti