Skattlagning arðgreiðslna úr hlutafélögum

Markmið þessarar ritgerðar er að gera grein fyrir þeim reglum sem gilda um skattlagningu arðgreiðslna úr hlutafélögum en skattlagningin getur verið með mjög mismunandi hætti eftir því hvernig staðið er að arðgreiðslunum. Lög um hluta - og einkahlutafélög veita skýr fyrirmæli um hvernig hluthafar skuli standa að úthlutunum á arði úr félögum sínum en iðulega fara þó margir hluthafar á svig við þær reglur með íþyngjandi afleiðingum. Það birtist meðal annars í þvi að árlega falla fjölmargir dómar og úrskurðir skattyfirvalda um áhrif þess að hluthafar kjósa að fara margvíslegar ólögmætar leiðir til þess að taka til sín verðmæti úr sjóðum félaga. Borin eru saman áhrif skattlagningar af mismunandi aðferðum við töku arðs en skattbyrðin er mjög mismunandi eftir því hvort löglega er staðið að úthlutun arðs eður ei. Gerð er grein fyrir þeim formskilyrðum og kröfum laga sem fullnægja þarf til að unnt sé að úthluta arði með lögmætum hætti og skattaáhrifum af þvi. Sé þessum skilyrðum ekki fullnægt með réttu telst úthlutun arðs vera ólögmæt og sætir úthlutunin annarskonar og mun íþyngjandi skattareglum. Í grunninn er sá munur á lögmætri og ólögmætri úthlutun arðs að sá sem tekur arð með lögmætum hætti greiðir fjármagnstekjuskatt af úthlutaðri fjárhæð en sá sem tekur arð til sín á svig við reglur greiðir fullan tekjuskatt auk álags