Verðandi mæður í vímuefnaneyslu, stuðningur og úrræði

Ritgerð þessi er lokaritgerð til BA prófs við félagsráðgjafardeild Háskóla Íslands. Tilgangur þessarar ritgerðar var að skoða hvaða úrræði og stuðningur eru í boði hér á landi fyrir konur sem eru í vímuefnaneyslu á meðgöngu. Gerð var grein fyrir þeim áhrifum sem algeng vímuefni, bæði lögleg og ólögleg, hafa á fóstur og nýbura auk þess var litið til langtímaafleiðinga sem vímuefnaneysla á meðgöngu getur haft á börn. Ritgerðin er fræðileg samantekt þar sem stuðst var við rannsóknir, bækur og ritrýndar greinar ásamt upplýsingaviðtölum sem stuðst var við varðandi stuðning hér á landi við barnshafandi konur í vímuefnaneyslu. Helstu niðurstöður leiddu í ljós að vímuefnaneysla á meðgöngu hefur sálrænar og líkamlegar afleiðingar fyrir börn og því er stuðningur mikilvægur við móður á meðgöngu og eftirfylgni eftir að barn er fætt. Kona í vímuefnaneyslu á Íslandi getur fengið stuðning í eitt ár eftir að barn er fætt. Með stuðningi og eftirfylgni er hægt að lágmarka þann skaða sem barn verður fyrir af vímuefnaneyslu móður á meðgöngu