Frímínútur : ekki lengur frjálsar mínútur

Verkefnið fjallar um hvaða áhrif það hefur á félagslega vellíðan nemenda í grunnskólum á Íslandi að hafa skipulagðar athafnir í frímínútum fram yfir hinn frjálsa leik. Lagt var af stað með vinaliðaverkefnið sem er verkefni sem snýst um að hafa skipulagðar athafnir í frímínútum og er það eina sinnar tegundar hér á landi. Á Íslandi eru um 29 skólar þátttakendur í verkefninu. Lagt var upp með rannsóknarspurninguna: Hafa skipulagðar athafnir í frímínútum grunnskólanema áhrif á félagslega vellíðan nemenda? Leitast var við að svara þessari spurningu með niðurstöðum úr fræðilegum skrifum og einnig með heimsókn í tvo grunnskóla hér á landi sem hafa verið þátttakendur í vinaliðaverkefninu í eitt ár eða lengur. Í þeim skólum talaði ég við sitt hvorn rýnihópinn um upplifun þeirra á verkefninu og hvort breytingar væru að sjá á nemendum eftir að verkefnið fór af stað. Helstu niðurstöður úr fræðunum styðja það sem rýnihóparnir höfðu að segja og komu niðurstöður rannsóknarinnar ekki á óvart hvað það varðar. Það er mikilvægt fyrir alla nemendur að hafa skipulagðar athafnir í frímínútum til þess að efla félagsfærni og virkja þá líkamlega en að sama skapi má ekki taka frjálsa leikinn í burtu þar sem hann gegnir líka mikilvægu hlutverki í þroskaferli allra barna. Ekki er hægt að alhæfa út frá niðurstöðum rannsóknarinnar þar sem úrtakið var lítið en á sama tíma styður hún það sem fræðin segja