Þróun refsinga fyrir kynferðisbrot gegn börnum. Brot gegn 202. gr. hgl.

Viðfangsefni ritgerðar þessarar er þróun refsinga vegna brota á 202. gr. almennra hegningarlaga nr. 19 frá 1940, sem er almennt refsiákvæði um kynferðisbrot gegn börnum. Öll börn eiga rétt á að alast upp í heilbrigðu og öruggu umhverfi og eiga rétt á aðstoð verði misbrestur á uppeldi þeirra. Börnum er tryggður þessi réttur með ýmsum lagaákvæðum í íslenskum lögum sem og alþjóðasáttmálum, sem Ísland er aðili að. Í gegnum tíðina hafa háværar raddir gagnrýnt vægar refsingar í málum um kynferðisbrot gegn börnum og hefur löggjafinn brugðist við þeirri gagnrýni með lögum nr. 40/1992 og 61/2007. Með lögunum var réttarvernd barna aukin til muna, bæði hvað varðar refsimörk og fyrningu brota. Markmið þessarar ritgerðar er að kanna hvort dómstólar hafi fylgt skilaboðum löggjafans og hvort þær breytingar sem gerðar voru hafi skilað sér í þyngri refsingum. Verður farið yfir breytingar sem hafa verið gerðar á 202. gr. hgl, og kanna hvernig refsingar sem hafa verið dæmdar af Hæstarétti í málum á grundvelli ákvæðisins hafa þróast meðfram stækkun refsiramma ákvæðisins. Að lokum verður horft til framtíðar hvað varðar refsinga fyrir kynferðisbrot gegn börnum skv. 202. gr. hgl