Vinnustaðamenning hjá íslensku þekkingarfyrirtæki

Vinnustaðamenning gegnir veigamiklu hlutverki í skipulagsheildum (e. organizations) og hefur hún verið tengd við árangur, bæði þegar horft er út frá árangri í framleiðni og ekki síður fjárhagslegum árangri. Vinnustaðamenning er mismunandi milli fyrirtækja, er óáþreifanleg, hefur áhrif á hvernig starfsmenn og stjórnendur hegða sér og vísar til sameiginlegra viðhorfa og almenns hegðunarmunsturs sem einkennir skipulagsheildir. Í þessari rannsókn er markmiðið að greina styrkleika og veikleika vinnustaðamenningar hjá íslensku þekkingarfyrirtæki. Leitast er við að greina hvort að mælanlegur munur sé á viðhorfi til menningar út frá starfssviði, mannaforráðum, starfsaldri, því hvort þátttakendur upplifi sig sem starfsmann móður- eða dótturfyrirtækisins ásamt því að greina hvort vinnustaðamenning fyrirtækisins styðji við nýsköpun og gott siðferði. Tilgangurinn er að auka við þekkingu á íslenskri vinnustaðamenningu og kynna niðurstöðurnar fyrir stjórnendum fyrirtækisins þannig að unnt sé að nota niðurstöðurnar til að styrkja innviði fyrirtækisins. Notast var við megindlega rannsóknaraðferð þar sem spurningalisti byggður á Denison líkaninu var notaður. Niðurstöður rannsóknarinnar gefa til kynna að vinnustaðamenning þessa íslenska þekkingarfyrirtækis sé veik, þar sem allar yfirvíddir Denison líkansins mældust á aðgerðarbili. Helstu styrkleikar eru þeir að starfsmenn eru nokkuð virkir og áhugasamir í starfi sínu, upplifa að þeir hafi frelsi til athafna og upplifa að hæfni starfsfólks sé mikilvæg í augum stjórnenda til að tryggja samkeppnisforskot. Það er áhugavert í ljósi þess að starfsmenn fyrirtækisins upplifa á sama tíma skort á fjárfestingu í starfsþróun þeirra. Helstu veikleika er að finna í verkferlum, gildum, framtíðarsýn og venjum innan félagsins. Þó að vinnustaðamenningin mælist veik þá gefa niðurstöður til kynna að hún styðji að einhverju leiti við nýsköpun og gott siðferði