Fjárfestingar lífeyrissjóða í fasteignum

Markmið verkefnisins er að greina það hvernig íslenskir lífeyrissjóðir fjárfesta í fasteignum. Fasteignasöfn stærstu íslensku lífeyrissjóðanna voru skoðuð og þau borin saman við fasteignasöfn stærstu lífeyrissjóðanna á Norðurlöndunum. Eignasamsetning ímyndaðra lífeyrissjóða var bestuð með mismunandi samvalsaðferðum og niðurstaða aðferðanna borin saman við raunverulega eignasamsetningu stærstu íslensku lífeyrissjóðanna. Farið var yfir skuldsetningu fjárfestinga í fasteignum hjá íslensku lífeyrissjóðunum og hún borin saman við það sem gerist á Norðurlöndunum. Lífeyrissjóðir geta fjárfest í fasteignum í gegnum mismunandi félagaform. Farið var yfir helstu tegundir félagaforma og kostir og gallar skoðaðir. Verkefninu er ætlað að vekja athygli á því að mynduð sé skýr fjárfestingastefna varðandi fjárfestingar íslenskra lífeyrissjóða í fasteignum. Lykilorð: Fasteignir, fjárfesting í fasteignum, lífeyrissjóðir, fasteignir sem fjárfestingarvara, vægi fasteigna í fjárfestingasafni lífeyrissjóða