Notkun barnabóka í leikskólastarfi : markmið forsendur leiðir : rannsókn í leikskóla

Markmið rannsóknarinnar var að kanna notkun barnabóka í leikskólastarfi með hliðsjón af markmiðum, forsendum og leiðum og fólst í því að skoða bókmenntastarf á leikskólastigi, markmið þess og stefnur: lestur fyrir börnin, aðstæður fyrir bókmenntastarfið, aðgengi barnanna að bókum, bókakost og bókainnkaup leikskólans ásamt umsjón með bókum. Tekin voru þrjú hálfopin viðtöl við tvo deildarstjóra, einn á yngri deild og annan á eldri deild, og einn leikskólastjóra, alla á einum leikskóla á landsbyggðinni; að auki var framkvæmd stutt vettvangsathugun á báðum deildunum og á bókasafni leikskólans. Gögnin voru tekin upp og skráð, síðan vélrituð og loks greind. Heildarniðurstöður rannsóknarinnar benda til þess að notkun barnabóka í leikskólastarfi sé nokkuð góð í þroskaþáttum svo sem málþroska, vitrænum þroska og þróun læsis en ábótavant í þroskaþáttum svo sem tilfinninga-, félags- og siðgæðisþroska og menningarlegu hlutverki barnabóka. Hægt er að draga þá ályktun að skýr markmið um notkun barnabóka í skólanámskrá myndu auðvelda að skapa réttar forsendur og vinna markvisst með barnabækur