Þróun íslenska sjónvarpsmarkaðarins

Meginmarkmið þessarar ritgerðar var að greina hver þróunin hefur verið í sjónvarpsáhorfi á Íslandi síðastliðin tíu ár. Þar verður skoðað hvaða áhrif erlendar streymisveitur hafa haft á íslenskan sjónvarpsmarkað síðan þær komu á markað. Bandaríska streymisveitan Netflix verður skoðuð sérstaklega þar sem hún hefur fengið góðar móttökur á Íslandi. Þeir aðilar á íslenska markaðnum sem voru skoðaðir sérstaklega voru RÚV, Stöð 2 og Sjónvarp Símans. Framkvæmd var greining á íslenska sjónvarpsmarkaðnum þar sem notuð voru fyrirliggjandi gögn frá Gallup, Markaðs- og miðlarannsóknum og Póst- og fjarskiptastofnun. Settar eru fram þrjár rannsóknarspurningar í þessari ritgerð: 1. Hver er þróun í áhorfi Íslendinga á sjónvarp? 2. Hvaða áhrif hafa erlendu streymisveiturnar haft á íslenskan sjónvarpsmarkað? 3. Hver er framtíð línulegrar dagskrár á Íslandi? Þegar greint var heildaráhorf Íslendinga kom í ljós að áhorf á íslenskt sjónvarp fer minnkandi. Heildaráhorf á stóru sjónvarpsstöðvarnar þrjár, RÚV, Stöð 2 og Sjónvarps Símans, hefur farið minnkandi síðastliðin tíu ár. Erlendu streymisveiturnar hafa haft töluverð áhrif á stöðvarnar á markaðnum. Stöðvarnar hafa brugðist við komu þeirra með streymisþjónustum til þess að aðlagast breyttum áhorfsvenjum neytenda. Þrátt fyrir það er niðurstaða greiningarinnar sú að heildaráhorf á stöðvarnar fer minnkandi. Það má að einhverju leiti rekja til þeirrar miklu fjölgunar sem hefur orðið á áskrifendum að streymisveitu eins og Netflix. Áhorf á línulega dagskrá hefur tekið miklum breytingum síðustu tíu ár þar sem áhorfið á línulega dagskrá er alltaf að minnka með hverju árinu. Út frá niðurstöðunum er hægt að álykta að í náinni framtíð muni línuleg dagskrá spjara sig þar sem meirihluti sjónvarpsáhorfs er enn í línulegri dagskrá. Það má þó einnig draga þá ályktun að ef horft er til lengri tíma mun framtíð sjónvarps á Íslandi felast í áhorfi þar sem fólk stjórnar því hvenær það horfir á sjónvarpið