Hvað er svona merkilegt við þessar félagsmiðstöðvar?

Áhugasamir geta haft beint samband við höfund óski þeir eftir að sjá heimildarmyndina.Verkefnið sem hér er lagt fram, Hvað er svona merkilegt við þessar félagsmiðstöðvar felur annars vegar í sér samnefnda heimildarmynd og hins vegar fræðilega greinargerð. Í heimildarmyndinni koma fram fjórir reynslumiklir starfsmenn á vettvangi frítímans og eiga það sameiginlegt að hafa á einhverjum tímapunkti starfað í félagsmiðstöð. Viðtölin veita innsýn í það faglega starf sem starfsfólk félagsmiðstöðva sinnir á degi hverjum, einskonar ígrundun á starfinu sem tekur á mikilvægi þess, hvað sé mest gefandi við starfið, hvort allir geti starfað í félagsmiðstöð sem og hvaða breytingar megi eiga sér stað á hinu faglega starfi. Slík heimildarmynd er góð viðbót við umræðu á fagvettvangi félagsmiðstöðva sem og ítarleg kynning á starfinu fyrir þá sem ekki þekkja til. Í greinargerðinni er rætt um fræðin á bak við félagsmiðstöðvastarf, sögu þess og markmið sem og hið mikilvæga hlutverk starfsfólks. Niðurstöður heimildarmyndarinnar leiddu meðal annars í ljós að félagsmiðstöðvastarf er gríðarlega öflugt og mikilvægt tæki til að vinna með börn og unglinga sem þurfa á aðstoð að halda sem og alla aðra sem taka þátt í starfinu. Starfið þarfnast jafnvel frekari viðurkenningar stjórnvalda til að það geti þróast og veitt sem flestum þá þjónustu sem þeir þarfnast. Lykilorð: Greinargerð, heimildarmynd, félagsmiðstöðvar, mikilvægi, hlutverk félagsmiðstöðva, starfsfólk félagsmiðstöðva, óformlegt nám