Viðhorf stjórnenda í verslun til færni miðaldra og eldra starfsfólks

Vestræn samfélög hafa breyst hratt á tiltölulega stuttum tíma, fyrst úr bændasamfélögum í iðnaðarsamfélög og síðan í tækni- og þekkingarsamfélög. Lægri fæðingartíðni samhliða auknum lífslíkum hafa leitt til lýðfræðilegra breytinga sem eiga sé enga samsvörun í sögunni. Vinnufærum einstaklingum mun fækka í framtíðinni, nýliðun á vinnumarkaði helst ekki í hendur við eftirspurn eftir vinnuafli og meira mun mæða á miðaldra og eldri starfsmönnum (Drucker, 2001; Ingi Rúnar Eðvarðsson, 1999; Nyhan 2006; Tikkanen, 2006). Störfin breytast hratt og stöðugt er gerð krafa um að starfsmenn tileinki sér nýja þekkingu, færni og viðhorf. Þess vegna er mikilvægt að færni starfsmanna sé í samræmi við kröfur vinnumarkaðarins, að allir starfsmenn leggi áherslu á nám eða lærdóm í tengslum við vinnuna (e. learning at work) og fái tækifæri til að mæta þessum auknu kröfum. Miðaldra og eldri starfsmenn eru þar ekki undanskildir. Rannsóknir hafa hins vegar gefið vísbendingar um að þessi hópur sitji eftir og fái ekki tækifæri til náms og þjálfun til að mæta nýjum verkefnum, nýjum aðstæðum og nýjum vinnuaðferðum (Félagsmálaráðuneyti, 2004; Framkvæmdastjórn Evrópusambandsins, 2006; Nilsson 2007; Rosenstock, 2004; Tikkanen, Lahn, Withnall, Ward og Lyng, 2002). Viðfangsefni greinarinnar er að skoða hvað rannsóknir segja um viðhorf til miðaldra og eldri á vinnumarkaði og færniþætti þá sem einstaklingar þurfa að búa yfir til að geta verið virkir þátttakendur þekkingarþjóðfélagsins. Kynntar verða og ræddar niðurstöður rannsóknar á upplifun og viðhorfum 37 íslenskra stjórnenda í verslun til færni miðaldra og eldri starfsmanna