Nemendur með ADHD : úrræði kennara og aðstaða

Á síðustu árum og áratugum hefur orðið mikil fjölgun á börnum sem fá greiningu vegna athyglisbrests með ofvirkni eða ADHD. Helstu einkenni ADHD eru athyglisbrestur, ofvirkni og hvatvísi, en þessi einkenni gera börnum oft erfitt fyrir í námi, verkefnum og leik. Ýmsar faraldsfræðilegar rannsóknir sýna að um 5-10% barna og unglinga glíma við ADHD í dag. Í tilfelli grunnskólabarna sem greinast með ADHD sýna ýmsar rannsóknir fram á að 50-70% barna hafa að minnsta kosti eina fylgiröskun. Algengustu fylgiraskanirnar eru mótþróaþrjóskuröskun og sértækir námserfiðleikar. Grunnskólakennari getur gert ýmislegt til þess að auðvelda nemanda með ADHD skólagöngu sína, meðal annars að haga skipulagi í kennslustofunni þannig að það henti betur að aðstoða nemendann persónulega við að skipuleggja sig í námi og að umbuna nemandanum markvisst fyrir jákvæða hegðun hans. Lög um grunnskóla kveða á um að öll grunnskólabörn eigi rétt á að fá kennslu við sitt hæfi í hvetjandi námsumhverfi. Einnig segja lögin að nemendur með sérþarfir eigi rétt á stuðningi í námi, þar á meðal eru nemendur með ADHD. Raunin er samt sú að það fá ekki fá allir nemendur með ADHD stuðning í námi sem gerir það að verkum að aukið álag er á kennara við að sinna þessum nemendum samhliða öðrum nemendum bekkjarins