Áhrif ADHD á nám barna í grunnskólum á Íslandi

Markmið ritgerðarinnar er að skoða þau áhrif sem ADHD hefur á nám barna í grunnskólum á Íslandi og þau úrræði sem nemendum standa til boða. ADHD er alþjóðleg skammstöfun sem stendur fyrir Attention Deficit Hyperactivity Disorder sem hefur verið þýtt sem athyglisbrestur með eða án ofvirkni. ADHD er greint eftir tveimur flokkunarkerfum, DSM-IV og ICD-10. ADHD er taugaþroskaröskun sem getur haft margvísleg áhrif á nám barna í grunnskóla sem getur orðið til þess að sum börn með ADHD þurfa á auknum stuðningi að halda frá fagfólki í skólaumhverfinu. Góð þekking á einkennum og afleiðingum ADHD er mikilvæg fyrir þá sem koma að máli barns með ADHD og að foreldrar, kennarar og annað starfsfólk skóla fái fræðslu um einkenni og afleiðingar. Meðferð sem dregur úr einkennum ADHD þarf að byggjast á íhlutun af læknisfræðilegum, sálfræðilegum, uppeldis- og kennslufræðilegum og hegðunarmótandi aðferðum. Lyfjameðferð hefur sýnt góða raun sem skilar sér í bættri líðan og stöðu barna námslega og félagslega. Bestur árangur næst með samþættri meðferð þverfaglegrar teymisvinnu og samstarfi fagaðila og sérfræðinga sem koma að máli barns með ADHD með reglulegum fundum með foreldrum. Börn með ADHD, eiga rétt á úrræðum samkvæmt lögum um grunnskóla nr. 91/2008. Þar kemur fram að skóli án aðgreiningar þurfi að bjóða jöfn tækifæri til allra nemenda til að stunda nám og að virðing sé borin til þeirra