Um listkennslu og skapandi skólastarf

Skapandi skólastarf er einn af grunnþáttum nýrrar menntastefnu íslenskra stjórnvalda þar sem birtist ný sýn á hvaða hæfni er talin nýtast nemendum best til að búa þá undir framtíðina. Á sama tíma sýna dæmi úr menntakerfinu aðra mynd en dregin er upp í menntastefnunni. Rannsóknir benda til þess að brottfall úr íslenskum framhaldsskólum sé töluvert meira en í nágrannalöndunum og bendir margt til þess að það megi að hluta rekja til ójafnvægis í áherslum menntakerfisins á ólíkar námsgreinar og að ekki finni allir nám við hæfi í skólunum. Tilgangur ritgerðarinnar er að skoða hvað skapandi skólastarf er, leita fyrirmynda að því í listkennslu og athuga hvort það geti nýst sem leið út úr þeim vítahring sem brottfall skapar. Verkefnið er fræðileg úttekt á rannsóknum og skrifum málsmetandi fræðimanna á sviði listkennslu og sköpunar. Úttektin leiðir í ljós að kennsluaðferðir og áherslur í listmenntun geta stuðlað að ákveðnum eiginleikum og viðhorfum hjá nemendum sem geta nýst þeim í öllu námi og að sömu aðferðir geta verið fyrirmynd að breyttum kennsluháttum með skapandi skólastarf að leiðarljósi