Úr viðkomustað í áfangastað. Leiðir að árangursríkari ferðaþjónustu í Dalvíkurbyggð.

Íslensk dreifbýli hafa í gegnum tíðina átt erfitt uppdráttar sökum breytinga á helstu atvinnuvegum líkt og í landbúnaði og sjávarútvegi. Í kjölfar þess stóðu svæðin frammi fyrir því að þurfa að leita nýrra leiða til þess að efla byggðaþróun og viðhalda samfélaginu. Í slíkum aðstæðum var horft til ferðaþjónustunnar en greinin hefur lengi verið nýtt sem þróunarráð fyrir einstök svæði eða héröð. Ferðaþjónusta felur í sér efnahagslegan ávinning fyrir samfélög þar sem hún meðal annars skapar atvinnu, eykur efnahagslega fjölbreytni og ýtir undir þjónustustig svæða. Í ljósi þess hve mikilvæg atvinnugreinin er fyrir viðkvæm hagkerfi er vert að skoða hvernig dreifbýli geta stuðlað að framþróun greinarinnar og komið í veg fyrir að svæðin verði fyrir hnignun. Í þessari rannsókn er Dalvíkurbyggð í kastljósinu og snýr viðfangsefnið að framvindu ferðaþjónustunnar þar ásamt því hvaða áskoranir geta staðið í vegi hennar. Framkvæmd var eigindleg rannsókn þar sem tekin voru þrjú einstaklingsviðtöl við ferðaþjónustuaðila á svæðinu. Í ljós kom að þeir þættir sem hafa leitt greinina til árangurs eru samvinna milli ferðaþjónustuaðila, persónulegt viðmót, tilfinning fyrir sanngildi, sérstaða, friðsæld og náttúrufegurð. Leiddu þá niðurstöður í ljós að þátttaka frumkvöðla til þess að stuðla að þessum þáttum sé lykillinn að árangri. Í niðurstöðum kom einnig fram að helstu áskoranir sem geta staðið í vegi fyrir framþróun greinarinnar séu lítil reynsla/menntun ferðaþjónustuaðila, traust til annarra ferðaþjónustuaðila innan svæðisins ásamt því að fá ferðamenn til að komast á svæðið. Af niðurstöðum má draga þá ályktun að styrkleikar vegi meira en áskoranir þegar kemur að framþróun ferðaþjónustunnar