Markaðssetning íslenskra húðvörumerkja á erlendum markaði

Tilgangur þessarar ritgerðar er að rannsaka markaðssetningu á íslenskum húðvörumerkjum erlendis og hvernig fyrirtækin komust inn á erlendan markað. Til að vörumerki nái árangri og öðlist staðfærslu er mikilvægt fyrir fyrirtæki að skilja hvernig skal hátta markaðssetningu fyrir hvern markað. Með tilkomu samfélagsmiðla hefur áhersla í markaðssetningu breyst til muna og er styrkur og ímynd vörumerkis mikið byggður á markaðssetningu. Rannsóknin snýr að því að bera saman ólíkar leiðir við framsetningu á íslenskum húðvörumerkjum og markaðssetningu þeirra erlendis. Tekin voru raundæmi af þremur húðvörumerkjum, það voru BIOEFFECT, Bláa Lónið og Dr. BRAGI. Áhersla var lögð á að skoða hvernig þau hafa skapað sér sess á erlendum húðvörumarkði. Framkvæmd var eigindleg rannsókn þar sem tekin voru viðtöl við einn einstakling á vegum hvers þessara fyrirtækja. Einnig voru tekin tíu viðtöl við hugsanlega viðskiptavini húðvörumerkjanna þar sem viðhorf til markaðssetningar húðvörumerkja var kannað. Rannsakandi túlkaði viðtölin og við gagnagreiningu komu í ljós fjögur meginþemu og eitt þeirra hafði fjögur undirþemu. Helstu niðurstöður eru þær að íslensk húðvörumerki komust inn á erlendan markað með því að byggja upp sterka vörumerkjatryggð, sterka vörumerkjaímynd og öðlast staðfærslu í huga neytenda. Hugað er að því að halda í ákveðna ímynd sem kemur fram í hönnun umbúða og gerð markaðssetningar. Það skilar sér í vörumerkjavitund og síðar vörumerkjatryggð. Lögð er áhersla á að vörumerkin séu einstök, þau komi úr íslenskri náttúru og að þau virki. Farsæl markaðssetning byggir á almannatengslum, áhrifavöldum og orðspori og skýrt er að það eru áhrifaríkustu leiðirnar til að byggja upp sterkt vörumerki