Staða mannauðsstjórnunar hjá Hreyfingu heilsulind

Lokaverkefnið er lokað í Skemmu í 5 ár með samþykki viðskiptafræðideildar.Markmið þessarar ritgerðar er að fjalla um rannsókn sem var lögð fyrir stjórnendur og starfsfólk Hreyfingar heilsulindar í mars 2018. Markmið hennar var að kanna stöðu mannauðsstjórnunar hjá fyrirtækinu ásamt því að kanna viðhorf stjórnenda til mannauðsstjórnunar hjá Hreyfingu. Þá var vinnustaðagreining lögð fyrir starfsfólk Hreyfingar með það markmið að kanna stöðu innra starfs hjá Hreyfingu ásamt því að mæla starfsánægjuna. Niðurstöðurnar leiddu í ljós að stjórnendur töldu að það mætti taka með ákveðnari hætti á mannauðsmálum. Þeir telja sig skorta ráðgjöf við ráðningu starfsfólks og þegar takast þarf á við erfið mannauðsmál. Mikilvægt er að auka skilvirkni í ráðningar-, móttöku- og þjálfunarferli starfsfólks auk þess sem gagnast gæti að innleiða formlegt frammistöðumat og í kjölfarið starfsmannasamtöl. Starfsánægja starfsfólks mældist mjög há, eða 92%, og er líðan starfsfólks á vinnustaðnum mjög góð. Starfsfólk virtist vera heldur óánægt með laun sín og voru þónokkrir sem ekki höfðu fengið hrós frá sínum næsta yfirmanni né samtal um frammistöðu. Niðurstöður rannsóknarinnar gefa til kynna að bæta þurfi úr ýmsum þáttum er varða mannauðsstjórnun hjá fyrirtækinu og telur rannsakandi að það gæti gagnast fyrirtækinu að ráða til sín mannauðsstjóra til þess að koma reglu á mannauðsmálin og aðstoða stjórnendur við mannauðsmál sinna deilda