Ábati þróunaraðstoðar: Samanburður á Suður-Kóreu og Nepal

Skoðanir eru skiptar um ágæti þróunaraðstoðar þar sem fyrir liggur að oft fara miklir fjármunir forgörðum vegna mikillar spillingar og annarra vandamála í viðtökuríkjunum. Flest lönd eru þó hlynnt veitingu þróunaraðstoðar og hefur magn opinberrar aðstoðar aukist mikið síðustu ár, sérstaklega eftir tilkomu þúsaldarmarkmiða Sameinuðu þjóðanna sem kynnt voru til sögunnar árið 2000. Í þessari ritgerð er gerð grein fyrir því í hverju þróunaraðstoð felst, hvaða ábata hún skilar og hvort aðstæður í viðtökuríkinu hafi áhrif á ábata þróunaraðstoðar. Í þessu sambandi er borin saman saga þróunaraðstoðar í Suður-Kóreu og Nepal. Farið er yfir helstu tímabil þar sem þróunaraðstoð spilaði stóran þátt í efnahags- og atvinnulífi þjóðanna og rakið er hvaðan og í hvaða mynd aðstoðin barst. Þá er gerð grein fyrir mati fræðimanna á virkni þróunaraðstoðar í löndunum tveimur auk þess sem rakin er staða efnahags- og atvinnulífs þeirra í dag