Christine og Eirik - Namn på barn av tysk-norske og tysk-tyske foreldre i Noreg i perioden 1960-1997

Samandrag I denne masteroppgåva har eg studert eit namnemateriale frå 1960-1997 i Noreg. Materialet gjeld fornamn på barn av tysk-norske foreldre i Noreg født i denne perioden. Eg har berre barn med eit fornamn i materialet. For å finne fram til foreldra, fekk eg hjelp frå Norsk Informasjonsteknologi (NIT) i Tromsø. Dei trakk foreldra ut frå opplysingar om fødeland og statsborgarskap på foreldra, og opplysingane er trekt frå Folkeregisteret i Noreg. På grunn av at dette gjeld nolevande personar, har eg krav til anonymitet i masteroppgåva når det gjeld omtale av fornamn. Eg har derfor berre omtalt fornamn i materialet kor det er fire eller fleire namneberarar. Eg har granska namna i lys av kjønn og etnisitet, både i forhold til samanhengen mellom kjønn og nasjonalitet på foreldra, og i forhold til namn på jentene og gutane. Eg har ein sosioonomastisk tilnærming til materialet og bruker teoriar frå sosiolingvistikken for å forklare namnebruken. Forholdet mellom tysk og norsk språk og kultur er nær, men den kulturelle og historiske likskapen avvik også mykje på grunn av 2. verdskrig og verknadane av han. I Noreg hadde vi hatt ein oppblomstring av det nasjonale frå 1814, akkurat som i dei tyske statane da dei etter kvart slo seg saman for å bli ein nasjon. Men 2. verdskrig gjorde at det nasjonale i Tyskland fekk fryktelege og negative konsekvensar, og ein såg ei dreiing bort frå det nasjonale i Tyskland etter krigen. I Noreg kan ein seie at det nasjonale fekk ei ny oppblomstring i etterkrigstida. Dette kan ein sjå både i namnebruken i Tyskland og Noreg. I dette spennfeltet er det svært interessant å granske namna i tysk-norske familiar i forhold til etnisitet og eit sosioonomastisk aspekt. Ein kan sjå at kompromissløysingar ofte blir valt, men at det nordiske også i stor grad gjer seg framtreiande