Ag plé le haincheisteanna measúnaithe i suíomhanna luathbhlianta Gaelscolaíochta

Déanfar scagadh san alt seo ar thaighde a rinneadh mar chuid de chéim Dochtúireachta san Oideachas (EdD). Measúnú sna luathbhlianta (aois 4-6) i scoileanna lán-Ghaeilge i dTuaisceart Éireann is ea ábhar an ailt. Déanfar anailís ar chleachtais mheasúnaithe i sampla de scoileanna agus d’aonaid lán-Ghaeilge de réir mar a chuireann múinteoirí agus príomhoidí síos ar na cleachtais sin. Tá an anailís neadaithe i bhfráma teoiriciúil soch-chultúrtha Lave (1988) ar fhearainn (‘arenas’) agus ar shuíomhanna (‘settings’). Míníonn na sonraí taighde an dóigh a ndéanann cleachtóirí codarsnachtaí sna polasaithe measúnaithe a láimhseáil i suíomhanna ar leith. Léiríonn na sonraí go bhfuil an measúnú i luathbhlianta na Gaelscolaíochta idirghníomhach, go bhfuil breathnóireacht an mhúinteora luachmhar agus gur tearc an líon uirlisí measúnaithe atá ar fáil do dhaltaí Bonnchéime trí Ghaeilge i gcomparáid le líon na n-uirlisí atá ar fáil trí Bhéarla. Cuireann an staidéar ar ár n-airdeall sinn faoin chaoi nár chóir daltaí a fhaigheann oideachas trí Ghaeilge a mheas le huirlisí atá deartha agus caighdeánaithe do pháistí aonteangacha Béarla